ಅರ್ಧ ಎಕರೆ ಜಾಗ ಸಾಕು ಹಾಯಾಗಿರೋಕೆ...

ಮಂಗಳೂರಿನ ಸಮೀಪವಿರುವ ಅಡ್ಯಾರಿನಲ್ಲಿ ಜೋಸೆಫ್ ಮೊಂಟೇರೊ ಎಂಬ 39 ವರ್ಷ ಪ್ರಾಯದ ರೈತನ ಬಳಿ ಇರುವುದು ಕೇವಲ ಅರ್ಧ ಎಕರೆ ಮಾತ್ರ. ಅರ್ಧ ಎಕರೆ ಜಮೀನಿನಲ್ಲೂ ಸಮಗ್ರ ಕೃಷಿ ಮಾಡಿ ಯಶಸ್ವೀ ಜೀವನ ನಡೆಸಬಹುದೆಂದು ತಮ್ಮ ಕಾಯಕದ ಮೂಲಕ ತೋರಿಸಿದ್ದಾರೆ.

ಅವರ ಅರ್ಧ ಎಕರೆಯಲ್ಲಿ 35 ಹಂದಿ, 40 ನಾಟಿಕೋಳಿ, 40-50 ಬಾಳೆ, 25 ತಂಗಿನ ಮರ, ಒಂದು ಹಸು ಮತ್ತು ಸ್ವಲ್ಪ ಅರಿವೆ ಸೊಪ್ಪು ಬೆಳೆಯುತ್ತಿದ್ದಾರೆ. ಇವರು ಇಬ್ಬರು ಹೊರರಾಜ್ಯದ ಕೂಲಿ ಆಳುಗಳನ್ನು ಇಟ್ಟುಕೊಂಡು ತಿಂಗಳಿಗೆ 15000 ಸಂಬಳ ಕೊಡುತ್ತಿದ್ದಾರೆ. ಒಂದು ಗೂಡ್ಸ್ ಗಾಡಿ ಇಟ್ಟುಕೊಂಡು ಮಂಗಳೂರಿನಿಂದ ಹೋಟೆಲ್‍ಗಳಲ್ಲಿ ಸಿಗುವ ಆಹಾರ ತ್ಯಾಜ್ಯವನ್ನು ಸಾಗಿಸಿ ಹಂದಿಗಳಿಗೆ ನೀಡುತ್ತಾರೆ. ಹಂದಿಗೂಡುಗಳಿಂದ ಬರುವ ತ್ಯಾಜ್ಯವನ್ನು ಸಂಗ್ರಹಿಸಿ ಗೋಬರ್ ಗ್ಯಾಸ್ ಉತ್ಪಾದಿಸಿ ಅಡಿಗೆಗೆ ಬಳಸುತ್ತಾರೆ. ವರ್ಷಕ್ಕೆ 3000-4000 ಕೆ,ಜಿ ಹಂದಿಯನ್ನು ಉತ್ಪಾದಿಸುತ್ತಾರೆ. ಕೇಜಿಗೆ ರೂ. 110-150 ರಂತೆ ಮಾರಿ 4-5 ಲಕ್ಷ ಒಟ್ಟು ಆದಾಯ ಗಳಿಸಿದರೆ, ಕೋಳಿಗಳಿಂದ 10 ಸಾವಿರ, ದಿನನಿತ್ಯದ ಖರ್ಚಿಗೆ ಅರಿವೆ ಸೊಪ್ಪಿನಿಂದ ಬರುವ ಆದಾಯವನ್ನು ಬಳಸುತ್ತಾರೆ. ಕೇವಲ ಒಂದು ಬಾವಿ ಮತ್ತಿ ಕೊಳವೆ ಬಾವಿಯಿಂದ ಸಿಗುವ ನೀರಿನಿಂದ ಎಲ್ಲವನ್ನೂ ನಿರ್ವಹಿಸುತ್ತಿದ್ದಾರೆ. ತೆಂಗು ಮತ್ತು ಬಾಳೆಯಿಂದ ಬರುವ ಆದಾಯ ಅವರು ಬಳಸುವ ಗೂಡ್ಸ್ ಗಾಡಿ ಡೀಸೆಲ್ ಗೆ ಸಾಕಾಗುತ್ತದೆ. ಮನೆಬಳಕೆಯ ಹಾಲಿಗೆ ಹಸು (ಗಿರ್ ತಳಿ) ತಂದಿದ್ದಾರೆ. ಹತ್ತಾರು ಎಕರೆ ಜಮೀನಿರುವ ರೈತರೇ ತಲೆ ಮೇಲೆ ಕೈಹೊತ್ತು ಕುಳಿತಿರುವ ಈ ಸಮಯದಲ್ಲಿ ಜೋಸೆಫ್‍ರಿಂದ ಕಲಿಯಬೇಕಾದ್ದು ಬಹಳಷ್ಟಿದೆ. ಕೊನೇ ಪಕ್ಷ ಜೀವನೋತ್ಸಾಹ.